20 yanvar şəhidlərinin anım günü ilə əlaqədar Bakı Şəhər İcra Hakimiyyəti Şəhidlər Xiyabanında artıq hazırlıq işlərinə başlayıb. Paytaxtın hər bir rayonunun mənzil kommunal təsərrüfat idarələrinin əməkdaşları xiyabanda təmizlik işlərinin aparılmasına cəlb edilib. Təmizlik işləri Şəhidlər Xiyabanının girişindən şəhidlərin ruhunu əbədiləşdirmək məqsədilə ucaldılan abidə kompleksinə kimi olan ərazini əhatə edir. Hər il olduğu kimi bu il də matəm günündə Xiyabanda qəbirüstü abidələrin üzərinin bəzədilməsi nəzərdə tutulub. Qeyd edək ki, Xiyabanın girəcəyinə güllərin düzülməsi könüllər tərəfindən həyata keçirilir. 20 yanvar şəhidlərinin anım gününə 3 gün qalmasına baxmayaraq, bu gün səhər saatlarından etibarən əhalinin şəhidlər xiyabanına kütləvi ziyarəti başlayıb.
Faciə günü ziyarətçilərin sərbəst şəkildə gediş-gəlişini asanlaşdırmaq üçüq Bakı Şəhər Baş Polis İdarəsi gücləndirilmiş iş rejimində çalışacaq. Qurumdan verilən məlumata görə, Əzizbəyov heykəli qarşısından Teleteatra qədər olan ərazidə avtomobillərin hərəkəti tam məhdudlaşdırılacaq. Məlumatda həmçinin deyilir ki, ilkin olaraq Şəhidlər Xiyabanını dövlət rəsmiləri, daha sonra isə əhali ziyarət edəcək. Təhlükəsizlik tədbirləri mərasim başa çatanadək davam edəcək. Bundan başqa, faciənin 19-cu ildönümü münasibətilə metro pulsuz xidmət göstərəcək
Yanvarın 20-də saat 12-də isə respublika ərazisində 20 yanvar şəhidləri bir dəqiqəlik sükutla yad ediləcək. Bu vaxt qatarlar, şəhərin əsas prospektlərində avtomobillər və Bakı buxtasında lövbər salmış gəmilər bir dəqiqə ərzində səs siqnalı verəcək.